29.4.09

Máis de recortes



Para comezar queda recollida a suxestión de Javi.

Agora aos problemas:
O problema das fichas lilas e verdes é tan complicado que ninguén (e mira que o comentei en varias clases do instituto) foi quen de resolvelo, ou polo menos ninguén me dixo aínda como. O que si que houbo foi falsas solucións, como adoita suceder neste tipo de problemas. Por isto vou poñer un problema semellante pero máis sinxelo.






Neste tedes que dividir a figura en dous anacos iguais en forma e tamaño, de tal xeito que nos dous cachos haxa o mesmo número de triángulos, cadrados, círculos e pentágonos. Ánimo, que non é tan difícil.
E aquí tedes o enlace ao xogo que comentei hoxe en 2º A.

The World Hardest Game

Vexamos se alguén o remata. Sinceramente non creo.

24.4.09

Competición de Tenis





Imaxinade que sodes os organizadores dun campionato de tenis. Veñen participar 657 xogadores de todo o mundo. A competición funciona do seguinte xeito: o gañador de cada partido avanza no torneo e o perdedor queda eliminado. Como hai un número impar de xogadores, o xogador máis forte obtén o paso á seguinte rolda automaticamente. A cuestión é:
Cantos partidos serán necesarios para determinar o campión do torneo?

22.4.09

Outro de chaves e lámpadas



Este é un vídeo practicamente obrigatorio nun blog persoal dun profesor coma min. De paso contesto mellor a alguén que me preguntou sobre Pink Floyd. Esta non é a miña canción favorita deles, pero ten un significado especial. Podedes atopar a letra aquí.

Por outra banda, sigo coa teima de recuperar problemas clásicos do limbo. Nesta ocasión toca a quenda dos problemas de interruptores e lámpadas (tema do cal xa apareceu un problema neste blog, aínda que o obxectivo do problema non tiña nada que ver co de hoxe). Ao conto:

No primeiro andar dunha casa hai tres interruptores, un dos cales está conectado coa lámpada do ático. O problema está en que non sabemos cal deles é o que fain funcionar a lámpada. E a vosa tarefa é facer algo con eses interruptores para saber cal é a conexión.

Aproveito para contestar aquí unha pregunta que me facía un lector anónimo (gustaríame saber quen foi, de verdade) nun comentario. Escoitade que cousa máis bonita de canción. De novo unha versión dunha canción supera á canción orixinal (non como nas actuais de Nothing Else Matters ou Eye in the Sky, polo menos na miña opinión). Escoitade,...




Nada máis por hoxe, xa foi suficiente, non si?

21.4.09

Bólas de billar


Outro tipo clásico dos problemas de enxeño consiste en detectar unha bóla (ou algo do estilo) que pesa distinto entre varias co mesmo peso, coa utilización dunha balanza. Para abrir o tema,velaí tedes un problema curioso:

Temos 8 bólas de billar, das cales 7 pesan o mesmo e unha é defectuosa e pesa máis que as outras. Como faríades para saber cal é a bóla defectuosa con só dúas pesadas nunha balanza?

17.4.09

Fichas lilas e verdes


Neste caso, tedes que tentar dividir o seguinte taboleiro en 4 anacos da mesma forma e tamaño, de tal xeito que en cada anaco haxa unha ficha lila e unha ficha verde. Obviamente os anacos poden estar xirados, se non non habería solución.
E un pouco de música dos anos 90, cun bo título, por certo.





Ah, Jose, agora non atopo o enlace, xa o buscarei a fin de semana.

15.4.09

Proba de Test

Pois iso, que estou a probar como queda un test no blog. É unha proba de porcentaxes para os meus alumnos de 1º, agora que estamos a comezar con iso dentro da unidade de proporcionalidade.

14.4.09

Un de medicinas





Un enfermo ten que tomar exactamente unha pastilla dun medicamento A e unha pastilla dun medicamento B cada día. As dúas pastillas, que non se poden distinguir a simple vista, teñen que ser tomadas ao mesmo tempo. En caso contrario, o enfermo morrerá. O paciente ten un frasco do medicamento A e outro do medicamento B. Colle na man unha pastilla de A, e mentres sostén na outra man o frasco do medicamento B, este esvara e cáenlle na man dúas pastillas B, de tal xeito que agora ten tres pastillas na man. Como as pastillas non se poden diferenciar, agora non sabe cal é do medicamento A e cales do B. As pastillas sonche ben caras, polo que non quere guindalas ao lixo. A pregunta é obvia:

Como farías ti para non estragar as pastillas e tomar a dose adecuada?

E velaquí outro xogo, neste caso un verdadeiro reto á velocidade mental e aos reflexos. Está en inglés, pero en cada fase é sinxelo intuir que é o que hai que facer.

Four Second Frenzy

13.4.09

Recargando

Aquí estamos outra vez! Teño que recoñecer que xa estaba un pouco farto de ver a foto de Einstein no blog.
Para comezar, un xogo que está tendo moito éxito na blogosfera, I wanna be the guy. Lede por exemplo o que comentan en Vida Extra sobre o xogo aquí. Se queredes xogar a algo realmente difícil, enriba tedes o enlace á descarga da demo.

Para continuar, unha pista para o problema da leira, que, se o tentastes, veredes que é máis complicado do que parece a simple vista, precisamente polas catro árbores que faltan. Se estivesen esas árbores, quizais sería máis sinxelo acomodar unha estrela que cumprise as condicións do problema, como comentaron naquel post.

Por se non queredes ver a pista, é dicir, aínda non "botastes papas", déixoa oculta. Por certo, só é unha das cinco liñas que hai que formar, tampouco é moita pista.


SPOILER





E para rematar, un novo problema, este rapidiño, para variar un pouco:

Que símbolo matemático hai que poñer entre os seguintes números para obter outro maior que 4 e menor que 5?

3.4.09

Idades


Este problema é máis un trabalinguas que un problema de Matemáticas, e é habitual nos libros de texto de 3º de E.S.O. para retar ás habilidades alxébricas dos alumnos. Se a primeira vez que o les quedas con cara de parvo, non temas, pois é o normal. Se segues con esa cara despois dun par de minutos, é o momento de preocuparse. Velaí o tedes:

Dille Carlos a Xurxo:
"A miña idade é o dobre da que ti tiñas cando eu tiña a que ti tes. E cando ti teñas a idade que eu teño, teremos entre os dous 63 anos"

Sinxelo, non? Pois a ver quen é o máis rápido a este lado do Sil.

Lembrando o que falamos en 2ºA, póñovos o enlace ao vídeo do Wario que, como comprenderedes, neste blog non se podería ver. Se non vedes nada estraño no vídeo, é que tedes moi alta a seguridade do navegador.

E o que vos comentei sobre o April's Fools Day (o día dos inocentes anglosaxón) está aquí:

Super Smash Brawl Gore Mode: On

Veña, pasádeo ben nas vacacións, pero non demasiado. Aqueles que teñades algún problema cos exercicios propostos na aula, podedes deixar por aquí un comentario e seguramente non tardarei en contestar.

2.4.09

A leira


Unha leira ten 45 árbores dispostos como amosa o debuxo. Queremos talar tódalas árbores agás 10, de tal xeito que estas formen 5 liñas rectas con 4 árbores en cada liña.

Que 10 árbores hai que deixar?

Suxestión: para nomear as árbores é útil nomear as celas como no xogo dos barcos (ou no Excel ou no xadrez...), usando letras e números para as ringleiras e as columnas.

E para ilustrar o humor do que estou hoxe vai unha canción de cando era máis novo:


1.4.09

Estrela de 8 puntas



Neste puzzle tedes que situar unha moeda en cada un dos vértices da estrela agás 1, pero cun pequeno detalle:

Ao colocar unha moeda tedes que movela ao longo dunha liña que estea baleira, e poñela ao final de tal liña baleira. Unha liña baleira é unha liña que non ten moedas nos seus extremos.

Por exemplo, se poñemos ao principio unha moeda no vértice 1 movéndoa ao longo da liña 4-1, logo unha moeda no 2, movendo pola liña 5-2, logo unha moeda no 3 (ao longo de 6-3), unha moeda no 4 (ao longo de 7-4) e unha moeda no 5 (ao longo de 8-5), perdedes, pois non hai ningunha liña baleira. Deste xeito só poríades 5 das 7 moedas.

Pois a ver se sodes quen de resolvelo. Non parece fácil, eh?